David Grosclaude publica La diversité pour survivre au réchauffement climatique et au refroidissement culturel, un libre que totòm, occitanista, antioccitanista, ecologista, democrata de tota borra, a de legir. Un libre de tèsis totas plan argumentadas e illustradas d’exemples dels melhors. Un libre plan escrit, clar ont la paraula sociolingüistica es pas la d’un universitari mas d’un òme que sap çò que ditz e qu’o sap dire. L’autor es jornalista e a trabalhat tota sa vida sus la question lingüistica demest plan d’autras tematicas.

Dins aquel ensag de 17 capítols David Grosclaude amb biais pausa las questions de la diversitat de las lengas e respond a las questions màgers que totes avèm ausit pausar pels que pensan uniformitat e unicitat. Pòrta un agait critic sul biais de considerar las lengas en França o dins los païses que respèctan pas mai la diversitat culturala que la diversitat dels biotòpes. Es tanben analisat amb una plan granda finesa lo jòc francés per escafar e remandar a las escobilhas las lengas autras que la del Rei. Son tanben estudiadas las questions del bilingüisme, dels traumatismes impausats per la negacion de la segregacion lingüistica. Un bilanç sus la diversitat lingüistica plan montat, que manca pas de metre en parallèl la diversitat lingüistica e la diversitat biologica.

L’autor se contenta pas d’analisar la situacion lingüistica en França mas la met cara a cara amb d’autras situacions, especialament en America Latina, çò que dubrís los orizonts de recèrca. Una granda riquesa d’informacions e de donadas bibliograficas. De responsas a fòrça questions que vos pausatz sul perqué de la situacion lingüistica ont sèm.

Un sol punt negre, l’editor, l’ADÈO, ges conegut del public, dels libraris e dels mèdias. Ne caldrà far una segonda edicion a cò d’un grand editor parisenc, ailàs! Mas dobtam pas que d’exemplaris seràn mandats als grands jornals sensibles a la diversitat.

GROSCLAUDE, David. La diversité pour survivre au réchauffement climatique et au refroidissement culturel, amb un prefaci de Christian Guyonvarc’h, ADÈO, 2026, 248 paginas. 17 èuros mai pòrts de mandadís.