Corsega e Sardenha an signat un acòrdi istoric

Dijòus, 17 de març de 2016, 03h00 Politica,Internacional

Corsega e Sardenha an signat un acòrdi istoric

Collaboraràn sustot en çò que tanh lor posicion institucionala dins l'Union Europèa, “amb independéncia dels estats”


Cullettività Territuriale di Corsica





Documents
Etiquetas
acòrdi, corsega, sardenha

Corsega e Sardenha signèron diluns passat a Aiacciu un acòrdi istoric (vidèo). Los dos presidents, Gilles Simeoni e Francesco Pigliaru, son convenguts de crear un espaci comun entre las doas illas, coma nòva region europèa, qu’a partir del mes de mai s’estendrà a las Illas Balearas.
 
Amb aquel acòrdi, Corsega e Sardenha collaboraràn sustot en çò que tanh lor posicion institucionala dins l'Union Europèa, “amb independéncia dels estats”. En mai d’aquò, an anonciat la volontat de far lo pont entre lo sud e lo nòrd de la Mediterranèa.
 
Tanben se son acordats sus una seguida de projèctes dont lo mantenement e lo desvolopament del servici maritim entre las doas illas, la promocion toristica o la defensa de las culturas autoctònas. Lo govèrn còrs a exprimit un grand interès per lo foncionament del sistèma autonomic sarde.
 
Corsega fa partida de l’estat francés e a un govèrn regional sobeiranista, del temps que Sardenha aperten a l’estat italian e benefícia un estatut especial d’autonomia. Levat lo sarde, qu’es la lenga territoriala màger, en Sardenha se parla d’autras lengas coma lo catalan a l’Alguer e lo còrs gallurés e lo sassarés al nòrd de l’illa. Las doas illas son a pena separadas per onze quilomètres de mar.
 
Los dos presidents an anonciat que vesitarián amassa Malhòrca lo mes de mai que ven per incorporar las Illas Balearas al projècte. Lo Govèrn Balear a pas encara confirmat aquela vesita.