la polícia indonesiana a arrestat aperaquí 1700 independentistas de Papoa
Divendres, 6 de mai de 2016, 03h00 Internacional
Los manifestants demandavan a l’ÒNU un referendum d’independéncia, en ocasion de l’anniversari de l’annexion de lor país a Indonesia
Cap de comentari
Nòvas restacadas
- 02.10.2015. MRG: los “assassinats extrajudiciaris” en Papoa Occidentala “atenhon de proporcions inacceptablas”
- 14.05.2015. Timida dobertura d’Indonesia a la Papoa Occidentala dins l’encastre d’una batalha diplomatica regionala
Etiquetas
independéncia, indonesia, ònu, papoa, repression
La polícia indonesiana arrestèt diluns passat aperaquí 1700 personas dins una manifestacion independentista en Papoa, convocada en ocasion de l’anniversari de l’annexion de la Nòva Guinèa neerlandesa de part d’Indonesia, en 1963, çò raportèt la polícia.
En mai dels 500 detenguts dins la capitala provinciala de Papoa, Jayapura, i a tanben de desenats d’arrestats dins autras vilas de la region, ont vivon 3,5 milions de personas. A l’ora d’ara cap de notícia d’informacions a pas raportat de violéncias.
Un activista papó, Markus Haulk, expliquèt a Reuters que los manifestants avián demandat un referendum amb supervision internacionala per decidir sus l’independéncia.
Anciana colònia neerlandesa, la Papoa Occidentala, foguèt ocupada per Indonesia en 1963 e annexada formalament en 1969, après un referendum ont sonque se permetèt la participacion d’un milièr de personas. Los independentistas argumentan que la Papoa Occidentala foguèt pas jamai descolonizada formalament e que, per tant, caldriá organizar un referendum d’autodeterminacion sul territòri.
Las organizacions independentistas de Papoa Occidentala —tant las associacions pacificas coma los grops armats— patisson despuèi de decennis la persecucion politica, militara, judiciària e policièra de l’estat indonesian.