Marròc a defendut a l’ÒNU l’autodeterminacion de Cabilia
Divendres, 6 de novembre de 2015, 03h00 Politica,Internacional
Marròc a defendut a l’ÒNU l’autodeterminacion de Cabilia
Sembla una responsa al sosten d’Argeria al Front Polisario dins lo Comitat de descolonizacion de l’ÒNU
Un comentari
(4 vòtes)
Lo govèrn del Marròc a defendut a l’ÒNU l’autodeterminacion de Cabilia, lo país de l’estat argerian poblat per d’amazighs.
Lo govèrn marroquin, a travèrs d’Omar Rabi, diguèt dins son intervencion a la sedença de las Nacions Unidas de Nòva Yòrk que “la comunautat internacionala deu metre en evidéncia las voses de mai de uèch milions de cabils que son estats tròp de temps gardats dins lo silenci e l’invisibilitat. D’aquela manièra s’esfondrarà lo mur de l’intolerància contra eles e la negacion de lors aspiracions legitimas”.
Aquela subta conversion de Rabat envèrs los dreches dels pòbles es clarament una responsa a l’intervencion d’Argeria dins lo Comitat de descolonizacion de l’ÒNU, en sosten al Front Polisario.
Cal remembrar que lo 14 de novembre que ven se complís 35 ans de la partença de l’estat espanhòl dels territòris de la Republica Aràbia Saharauí Democratica (RASD). Après la partença dels espanhòls, los saharauís proclamèron la lor independéncia mas l’invasion marroquina provoquèt un conflicte qu’encara es luènh d’èsser resolgut.
Las doas intervencions de dos diplomatas marroquins en favor de Cabilia, dins l’espaci d’una setmana, semblan d’indicar un cambiament de la politica exteriora de Marròc tocant Argeria. En Marròc quitament s’especula amb la possibilitat que lo govèrn de Rabat reconesca lèu lo govèrn de Cabilia en exili, que se formèt lo 1r de junh de 2010 a París.