primera manifestació d’hologrames burla la Ley Mordaza
>>> video youtube 42" <<<
Madrid: espectaclosa manifestacion d’ologramas
De manifestants del Mond entièr an fach la primièra manifestacion olografica contra la lei de seguretat ciutadana que l’a pas poguda reprimir
Divendres passat, pendent la nuèch, de milièrs de manifestants participèron a una protèsta davant lo Congrès dels Deputats espanhòl, a Madrid, contra la nòva Lei de seguretat ciutadana, una lei fòrça repressiva qu’auriá quitament enebit aquela manifestacion. Mas en aquel cas se sabiá pas çò que caliá far pr’amor que los manifestants èran que de projeccions olograficas. La còla del sit Hologramas por la Libertad (D’ologramas per la Libertat) aviá fach una crida a de personas del Mond entièr per qu’escanerizèsson lors còrses e que permetèsson de los emplegar dins aquela protèsta insolita.
Una còla de tecnicians foguèt capabla de convertir puèi aqueles imatges en una autentica manifestacion, originala e impossibla de reprimir (vidèo).
An protestat contra una polemica Lei espanhòla de seguretat ciutadana, aprovada en genièr passat, solament amb los vòtes del Partit Popular (PP). Se tracta d’una reforma del còde penal qu’inclutz, entre diferentas mesuras, la preson a perpetuitat, nomenada eufemisticament “preson permanenta revisabla”. Lo govèrn espanhòl ditz qu’aquela condemnacion a perpetuitat se poirà solament aplicar dins los cases d’assassinats grèus coma lo magnicidi (es a dire l’assassinat del rei, del prince eiretièr o d’un cap d’estat) o ben coma la mòrt de menors de 16 ans, l’assassinat precedit de violament e los delictes de terrorisme.
Se punís la resisténcia pacifica
Aquela reforma elimina del còde penal çò que fins ara èra considerat coma de “fautas”. Ara totes los faches punidors seràn considerats coma de delictes. Se punís la resisténcia pacifica en las manifestacions, un delicte que s’apond al d’atemptat e de desòrdre public dins lo cas d’incidents amb la polícia.
Aquò es la 28a reforma del còde penal espanhòl e punís pel primièr còp lo maltractament, l’abandon e l’esplecha sexuala dels animals. Prevei tanben de penas e de sancions pels promotors dels combats de cans e de gals.
La nòrma enduresís las sancions contra la produccion de materials qu’inciten a l’òdi e la violéncia per de rasons de raça, sèxe, orientacion sexuala, religion o origina nacionala, e tanben per aver de material destinat a la violéncia o l’umiliacion d’aqueles grops.
Amnestia Internacionala i vei una “grèva reculada per la libertat d’expression”
Amnestia Internacionala a criticat durament aquela reforma penala. Dins un comunicat assegura que se tracta d’“una grèva reculada per la libertat d’expression e de reünion” perque dificulta aqueles dreches e evita los crimes de drech internacional. La reforma —çò dison— aumenta las penas e de delictes contra los manifestants “sens cap de justificacion”, e ditz coma exemple lo fach que se considèra ara fòrça mai grèu lo delicte contra l’autoritat quand se produtz dins lo contèxt d’una manifestacion, e punís amb preson la resisténcia pacifica.
13-IV-15, jornalet.com