Sardenha promulga una lei de normalizacion lingüistica
Dissabte, 30 de junh de 2018, 03h00 Internacional,Lenga
Sardenha promulga una lei de normalizacion lingüistica
Se crearà un estandard e una nòrma per la lenga sarda, que ven cooficiala amb totas las autras lengas autoctònas de l'illa
5 comentaris
(8 vòtes)
Lo Conselh de Sardenha
Senhalizacion bilingüa en italian e sarde
Carta lingüistica de Sardenha
© Dch
Etiquetas
estandard, lengas, normalizacion, sarde, sardenha
Sardenha normaliza enfin sas lengas autoctònas. Lo sarde serà estandarizat e vendrà lenga cooficiala, e a l’encòp seràn tanben oficialas las autras lengas de l’illa coma lo catalan de l’Alguer, lo còrs de Gallura, lo sassarés e lo ligur tabarquin, segon la lei de politica lingüistica aprovada lo 27 de junh passat a l’Assemblada de Sardenha, çò rapòrta Corsica Oggi.
Amb aquela lei, los elegits sardes vòlon garentir l’estatut d’oficialitat de las lengas e ne reviscolar la transmission intergeneracionala. Lo govèrn autonòm de l’illa pren las competéncias en educacion per coordenar l’ensenhament de las lengas e dins las lengas, e mai se preveja d’accions per portar las lengas als mèdias, als espleches informatics, a Internet, etc., del temps que se trabalha per una television e una ràdio completament en lenga sarda.
Estandarizacion del sarde
La lei etablís tanben un organisme nomenat “Consulta de su sardu” que deu prepausar un estandard lingüistic e una nòrma ortografica. Serà un organisme que las autoritats consultaràn sus l’aplicacion de la nòrma.
La “Consulta de su sardu” compren una trentena de membres tan politics de divèrsas administracions coma scientifics del camp universitari.
Lo plan de normalizacion lingüistica de Sardenha a un budget de sèt milions d’èuros per las tres annadas avenidoiras.