puja la tensió militar entre Somaliland i Puntland

Diluns, 2 de julhet de 2018, 03h00 Internacional,Politica

Puèja la tension militara entre Somaliland e la region federada somali de Puntland

Lo govèrn somalilandés cèrca d’enfortir sa posicion sobeirana de facto


Marrit Flac Bon Plan bon Fabulós (3 vòtes)


An aumentat ongan las tension militaras entre Somaliland e Puntland, dins lo nòrd del territòri internacionalament conegut coma una partida de Somalia. Segon lo Crisis Group, los dos estats son a comolar d’efectius militars dins la region de Sool e Sanag, que cadun revendica coma pròpria.
 
En genièr passat, las fòrças somalilandesas prenguèron lo contraròtle de la vila de Tukaraq. Dempuèi alara, Puntland menaça de la recuperar per fòrça.
 
Tukaraq se tròba dins los limits de l’anciana Somalia britanica, lo territòri que lo revendica Somaliland coma pròpri. Las autoritats somalilandesas argumentan que lor sobeiranetat nacionala serà pas garentida fins que contraròtlen tot aquel ancian territòri colonial britanic.
 
Somaliland es un estat independent de facto dempuèi 1991, quand se separèt de Somalia, mas es pas estat formalament reconegut per nat país. Pasmens, ten de relacions diplomaticas amb de païses coma Etiopia, Jiboti o los Emirats Arabis.
 
Per contra, Puntland —qu’agís tanben essencialament coma un país independent— se considèra el meteis un estat federat de Somalia. Refusa lo drech de Somaliland d’èsser un estat sobeiran e argumenta que las tèrras contestadas correspondon a Puntland, en se basant sus de critèris clanics e geografics.